======= #Haysiya_Go"aa ====

‎ ======= #Haysiya_Go"aa ====

‎ Wolayttan diya dumma dumma haqatuppe issoy haysiya. Haysee doonan odettiya hayda. Haysiyayyoo sunttay hayda hayse woykko leemiso hayse geetettidi xeesettanawu danddayees.

‎ Haysiya yootanaassi lo’’o imotay diyo asati naa’’utoo heezzutoo siyoogaappe hini baggan oyqqi aggoosona. Cima asaykka darotoo ooyettaaga sigettanawu, luxissanawu, haasayiiddi diyo yohota minttanawu, kayyottida uraa minttettanawu, asaa giddon diya iita eeshshata boride woykko zoridi teqqanawu, h.h.m. yohotussi go’ettanawu danddayiyo gita eratetta.

‎ #Haysiya_Giddon_Diya_haydaaawata

‎ Haysee darotoo asan mehiyaninne do’atun amppettidi merettees. Issi haysiya giddon diya haydaawati meheta do’atanne dumma dumma asata gidanawu danddayoosona. He haydaawati issi issi haysiya giddon meheta xalaala gidanawu danddayoosona. Issitoo issitoo qassi do’ata xalaala gidanawu danddayoosona. Hara haysiyan qassi haydaawati asa xalaala gidanawu danddayoosona.

‎ Hegaappe qassi dummatiyagee issi issi haysetu giddon asaynne do’ay woykko asaynne mehee woykko meheenne do’ay haydaawata gididi beettanwu danddayyoosona.

‎ #Haysiya_Oduwa_Doommanaappe_Kasetiyaabata

‎ Haysiya doommanaappe kase yootiyageenne ezggiyageeti giyoobati de’oosona. Haysiya yootiya uray oduwa doommanaappe kasetidi “Haysee haniis/hanees!” gees. Ezggiyageeti qassi zaaruwa immiiddi "haniis/hanidi wogiis/hanidi hannaniis! yaagoosona.

‎ #Haysiya_Oduwa_Doomiyo_Maaraa

‎ Haysiya odiyo wode oduwassi maaray dees. Haysiya yootiyo wode doomettan ‘‘Beni wode…, Beni issi gallassi …, Beni issi galllasi…, Gallassatuppe issi gallassi…, h.h.m qaalatun go’ettidi yootuwa doommees. Haysiya oduwa doommiyo wode daroppe takkida woykko gam’’ida wode hanidabaa gidiyogaa qonccissidi yootees.

‎ #Haysiya_Yootuwa_Wurssiyo_Wodiyan

‎ Haysiya yootiya izaawu haysiya yootidi wurssiyo wode “He gallassappe doommidi (ebeloy, asi woykko do’ay) hagaadan haniis geetettees. He wodiyappe doommidi, He layttaappe doommidi saro diidosona, ufayssan diidosona geettees yaagiyo kuushshaakko gakkoosona. “Geetettees” yaagiya qaalay beni wodeesappekka doommidi haysiya yootiya uray haysiya yootidi wurssiyo wodiyan go’ettiyo meeze qaala.

‎ Haysiya yootiyagee wurssiiddi, naachcha mala geettata gees. Hegeetikka “Taani haysiya yootido doonan eessaa eessaa mixxillaydda zayiya tookkada kawo sintti! Woykko “Ta ayfee phuphulqqu! Intte ayfee cucum!” woykko Ta na’ay zayiya ba’’idi eessaa mixxilliiddi kawo sintt! (daanna sintti!) Intte naati hariya toggidi, gurbbaa tookkidi, zaallumaa mixxilliiddi daanna sintti! Woykko “Haysee haysiyan gayttiis, taani de’ays!” Woykko “Hayseenne ba soo taanne ta soo!”. Wurssettan Taani odada kiyido doonan eessaa mucays. Haysiya haysiyan zaarite. Giidi kuushshaakko gakki aggees.

‎

‎Wolaytta Kummetta Miidiya Haggaazaa Eqotan Giigidi Gifaataa Tube geetettiya Miidiyan Shiiqidaagaa, Guuliya 27 gallassaa 2017 M.L.

‎email - gifaataatube@gmail.com

‎website- http://gifaataatube.blogspot.com

‎Youtube- https://youtube.com/@gifaataatube

‎Tiktok- https://tiktok.com/@wolaytta.naatu.keettaa

‎ Facebook:- https://www.facebook.com/share/1EZRVzrQtr/

‎https://www.facebook.com/share/16t5CTL6jo/

‎https://www.facebook.com/share/16kTnUc3pQ/

‎https://www.facebook.com/wolayta.dicha.982731

‎telegram- https://t.me/gifaataatube

‎