====== #Haqay_aybee? =====
Wolaytta Doonaa giddon daro haqaa qommoti doosona. Leemiso haasayati, hayseti, anjjoti, qanggettati, qan’’isheti, gereessati, gayroti, zilaassati, koyssati, xooringgeti, wucuwungguruceti, istti isttoy, botettay, caaqoti, hegeetanne hegeeta milatiya cora qommo haqati doosona.
#Haqa giyo qaalay ooratta qaala gidikkonne, ha qommo baggaara beettiya cora qommobatussi kotta suntti baynnaagaappe denddidaagan eta ubba xaaxi waaxin issi sunttan xeesanawu koshshido gishshawu haysiya giya qaalaappe ‘ha’ giya cenggurssaa ekkidi qan’’ishiya giya qaalaappe ‘qa’ giya cenggurssaa ekkidi medhdhido ooratta qaala.
Hageeti qommo baggaara qonccissido haqati Wolayttan mayzza Aawati Adussa wodiyaappe doommidi go'ettiidi hachchi gakkanawu ehiidoogeeta. Kase wode haqa geetettidi erettennabati leemisuwassi ekkikko qilliicciya malatiyabatikka ha'i wodiyan haqa pilgettaa garssan ekettidosona. Haray attin, keettaa godaa bolla xaafettidabatikka, sheeshsha keettan xaafettidabatikka, duufuwa bolli xaafettidabatikka, maayuwa macara bolli xaafettidabatikka haqadan ekettidi xanna’ettiyoogaa mata wode piliggettay malaatees.
#Haqatu_go’’ay_ichchashawu_shaahettees.
1. Qonccissuwa,
2. Minttuwa woykko tossaa,
3. Dogissuwa,
4. Luxissuwanne
5. Seeruwa/Teqettaa geetettoosona.
1. #Qonccissuwa :- baaso oyshatussi zaaruwa immees. Leemisuwassi asaa, mehiya, do’aa, dozata, hegeetanne hegeeta malatiyabati awuppe merettidaakkonne zaaruwa immanawu malees.
2. #Minttuwa/Tossaa:- asay banttawu diya meezetanne ammanidobata, woykko h.h.m yohota asay guye geennan ekkana mala ammanttanawunne bantta qofaa minttanawu haqan go’ettoosona.
3. #Dogissuwa:- asay ha sa’aa duussaa giddon ufayttennabatinne un’’ettiyobati diyo wodiyan hanotaa balanaadaaninne un’’uwa dogidi ufayttanaadan haqay maaddees.
4. #Luxissuwa:- Haqay dumma dumma leemisotun go’ettidi asaa luxissanawu woykko heessoyanawu keehippe maaddees.
5. #Seeruwa/Teqqettaa:- Haqay teqettawu maaddees giyogee asay dumma dumma wodetun asay borssiyabatanne boqosissiyabata xeelliyagan,
#leemisuwassi :-
*kaysotettaa,
*wordduwa,
*yiiqiya,
*iitatettaa, h.h.m yohota teqqanawu haqay gita go’’aa immees.
#Bilaanne_haqaa_Dummatettaa
Daro wodiyan daro asaassi "haqay bila gididi mooddettanawu danddayii danddayennee?" Giyogee oysha gididi takkiis. Eta dummatettay:-
#Bilaa:- bilay darotoo xaafetti uttidabaa woykko woraqati oyqqidobaa.
#Haqaa:- haqaa giyooge qassi ambban gidin ganddan asay doonan haasayiyo bila gididi yeletaappe yeletawu laatettidi aadhdhiyabaa. Haqay zammaana bilaappe dummatiyo gaasotuppe bayratiyagee xaafettennan doona xalaalan haasayettiyabaa gidikkonne haysetu giddon do’atuyyoonne mehetuyyoo asa eeshshaa immidi haasayissiyo gishshawu haqaayyoo bilaara dabbotay diyogee beettees.
Leemisotussinne qan”shetussi dantto malatiya qottay diyo gishshawu zammaana bilaa malatiyogee erettees. gereessaa ekkiyabaa gidikkokka daroppe doorettida yallisa qaalata gereessan go’ettiyo gishshawunne zammaana bilaa giddon diya daro makkiso qaalati gereessaa giddon diyo gishshawu haqay zammaana bilawu baaso.
Wolaytta Kummetta Miidiya Haggaazaa Eqotan Giigidi Gifaataa Tube geetettiya Miidiyan Shiiqidaagaa, Guuliya 27 gallassaa 2017 M.L.
email - gifaataatube@gmail.com
website- http://gifaataatube.blogspot.com
Youtube- https://youtube.com/@gifaataatube
Facebook:- https://www.facebook.com/share/1EZRVzrQtr/
telegram- https://t.me/gifaataatube
0 Comments